E silia ma le 1.4 miliona tui puipui o le Pfizer ua faaleaogaina pe o le a faaleaogaina foi ona ua oo i le taimi e expire pe uma ai le aogā ae lei faaaogaina. 

O le faamatalaga e pei ona lipotia i le Televise tasi ua faailoa ai e le Te Whatu Ora ua mae’a ona lafoai le tusa ma le 870 afe o ia tui ma le isi 570 afe e oo atu foi i le Aso Faraile nei ua le aoga foi.

Fai mai i latou e nafa ma le faia o tuipuipui e na o le 47 pasene o i latou sa agavaa mo le tui lona lua na mafai ona oo atu e fai tui, o lona uiga o le isi 780 afe e lei faatinoina lea tui.

Ua ta’ua e i latou ia o le itu aupito tāua o le faia o le puipuiga e tatau ai i tagata e tele le lamatiaga e maua ai i le koviti e pei o tagata matutua ae e tele foi ma eseese mafuaaga ua faatuai ai le agai atu o isi e fai o latou tuipuipui o le faamai.