Pe ā ma le 50 afe tagata ua lafo atu iai se text e lapataia ai i latou sa iai so latou sootaga i nisi ua feta’ua’ina o ni drug runners ina ua maua lelei e leoleo i NSW ni telefoni ua masalomia o loo faatino ai le faiga lea e faaigoa o le dial a dealer i Sini.

O Aperila o le tausaga na tea nei na faatuina ai le Strike Force Wessex e suesue ai kulupu solitulafono e aofia i le sapalaia o fualaau faasāina i le setete.

Fai mai sa suesue foi e le ausuesue lea nisi o kamupani faitelefoni e feta’ua’ina latou te sapalaia sim cards tau faasese, lea foi sa osofaia ai e leoleo ni faleoloa se lua i Bankstown ma Bass Hill ia Tesema ma Ianuari.

Fai mai na maua iai sim cards sese, false sim cards e oo atu le tau i le silia ma le 110 afe.

Na ta’ua e leoleo e toatele ua molia i le mataupu lava lenei mai suesuega sa faia ia Fepuari.

Ua faailoa e le alaata 9 e 8 telefoni na maua e leoleo o loo iai le aofaiga o numera o telefoni e 26 lea e faapea e faaaogā e le ausolitulafono ia e faatamoe ai le sapalaia o fualaau faasāina lea e ono oo ai i le aofaiga lea a latou clients, pe a ma le 50 afe.

I le text la ua lafo ane e leoleo i le 50 afe lea ua lapataia ai ua o latou iloa o le numera lea o loo aafia i se faiga faasolitulafono e faatatau i le sapalaia o fualaau faasāina ma ua fautuaina ai ia tagata ia taofia loa ona toe fesootai i le ausolitulafono ma o loo faaauau pea lava foi suesuega.

Fai mai leoleo o le isi taulaiga ua iai nei o le suesueina loa lea o i latou sa feagai ma le faatonutonuina o telefoni.