O Aso Tofi uma e usuia ai fonotaga a le Palemene e pei ona amata i le vaiaso nei, o le a laei uli uma ai sui faipule ma tagata faigaluega o le ofisa o le fono, e faailoa ai le lagolago atu i taumafaiga e tafiesea o soo se ituaiga o sauaga e aafia ai tina ma tamaitai faapea fanau.

Ua ave le tuualalo a le Fofoga Fetalai le susuga Papalii Li’o Oloipola Tae’u Masipa’u i sui mamalu o le fono aoao, e laei le lanu uliuli o le faamaite a le Malo e lagolago ai taumafaiga uma mo le taofia o sauaga o se faafitauli ua tele taumafaiga a ekalesia ma faalapotopotoga tuma’oti i Samoa o loo latou faatino i le faamoemoe autu, ia puipuia le ola lelei ma le soifua saogalemu o tina ma tamaitai faapea fanau a le atunuu.