Ua i’u lava ina ave i le tulafono pe molia foi le Peresetene o Korea i Saute o Yoon Suk Yeol ona o lana folafolaga e faatatau i ni pulega faamiliteli i le atunuu ua afua ai le tetee o le to’atele lea ua oo ai lava ma le mataupu i le National Assembly.

O le palota na faia ua pasia ai le faia o moliaga faasaga i le ta’ita’i o lona uiga la ua faamālōlō ai ma ona malosiaga ma ona tiute foi faaperesetene ma ua filifilia ai ma le Palemia o Han Duck-soo e na te ta’ita’ia le atunuu mo le taimi nei.

E oo i le 180 aso e faia ai se faai’uga a le faamasinoga le Constitutional Court pe faate’a ese loa Yeol mai ona tofiga o le Peresetene, pe toe faatumau.

Afai ae aveesea mai le tofi o lona uiga o le a faia loa se palota e filifilia ai lona sui ma e tatau ona faia lea faiga filifiliga i totonu o le 60 aso.

E faitau afe tagata na tumutumu ane e faatali le faai’uga o le palota i le Aso Toonai ma na faalogoina le feei fiafia o le to’atele ina ua pasia le ave o le Peresetene i le tulafono.

Puna o Faamatalaga: https://www.9news.com.au/world/south-koreas-parliament-votes-to-impeach-president-yoon-suk-yeol-over-his-martial-law-order/17326095-2e43-46cb-97d9-a461c3cfde9f