O auala o feoa’iga mo ta’ita’i o Malo o le Taupulega ma latou usugafono, aemaise o minisita o le va i fafo a malo o le taupulega o le a fono foi i Samoa i le masina fou, ua faasoa iai le tele o taavale a le malo latou te faaaogā.
O se tasi lea o tapenaga tāua mo lea fono faavaomalo i le masina fou, e pei ona faailoa e le ta’ita’ifono o le komiti o gafa ma auala o fesoota’iga le Ofisa Sili o le matagaluega o galuega tetele a le malo, ma le tamaitai Ofisa Sili o le pulega o feoa’iga i luga o le laueleele.
Ua itiiti taavale mai tua o le a faaaogā ae o taavale a le malo o le a tele ina faaaogā i le taimi atoa o lea fonotaga.
O se tasi o tapenaga tāua o nofoaga o le a nonofo ai usugafono e pei ona faailoa e sui o le komiti o loo feagai ma lea tapenaga o le tele o faletalimalo ma fale apitaga i le li’o o le taulaga o le a faaaogā.
O se sui o le komiti mo apitaga o le Fono a Malo o le Taupulega le faletua afioga Fia’ailetoa Charlotte Chan Mow Brunt, o le pelesetene o le asosi o le aufaifaletalimalo i totonu o le atunuu.
