O le vaiaso nei lea ua faatulaga e malaga ane ai le Palemia o Isaraelu, Benjamin Netanyahu i Amerika e faatalanoa nisi o mataupu tāua aemaise o le latou manumalo i le Hamas, le tetee atu ia Iran ma le faalauteleina o sootaga ma atunuu Alapi pe a faia le la fonotaga ma le Peresetene o Amerika.
Fai mai o le ulua’i feiloa’iga lea a Trump ma se ta’ita’i mai fafo atu o Amerika i le Fale Pa’epa’e talu ona toe tula’i mai i le tofi.
O loo finau ane le Hamas o le a lē faamatuuina ane isi pagota Isaraelu i le Vaega 2 o le maliega ma Isaraelu pe afai e lē faamutaina le taua ma aveese mai vaega’au a Isaraelu mai Gaza.
Ua lipotia e le BBC o loo una’ia foi e le isi vaega o le faigamalo a Isaraelu le faaauau pea o le taua pe a mae’a faataunuuina le vaega muamua o le maliega lea e tatau ona mae’a i le amataga o Mati.
E lē o manino mai poo fea o tu ai Trump i le mataupu lea auā ua leva ona faailoa e Amerika le lagolago ia Isaraelu ae o loo finau foi ia faamuta loa le taua i Sasae Tutotonu.
Puna o Faamatalaga: https://www.9news.com.au/world/israel-gaza-update-benjamin-netanyahu-heads-to-us-to-discuss-victory-over-hamas-with-donald-trump/f9243a5a-cc6b-4b5b-b9e1-9d0d05ce0ae9
