Ua lipotia e i latou na molimauina vevesi i luga o magāala o Iran, le tulaga ua iai nei le atunuu i le vaiaso lona tolu lenei o tete’e faasaga i le faigamalo. Fai mai ua iai tagata ua maliliu ona o le tali ane o vaega’au tau le puipuiga i le ‘au solo tete’e.
O loo faalālā atu pea e le peresetene o Amerika, Donald Trump le ono iai o se gaioiga faamiliteri a lona atunuu i Iran pe afai e fa’aauau pea ia vevesi.
Peita’i o loo ta’ua i le CNN o loo iai se faamatalaga mai le Fofoga Fetalai o le Palemene a Iran, e faapea o nofoaga a le militeri a Amerika ma nofoaga tau pisinisi o le a agai iai sa latou tali atu pe afai e iai se gaioiga faamiliteri mai Uosigitone.
Ua ta’ua i lipoti a itiiti mai pe 496 tagata tete’e ua fasiotia ma le silia i le 10,000 ua pu’eina i totonu o le lua vaiaso ua tuanai.
Ua tape ma ua lē toe faaola ane le initaneti i le atunuu ma ua atoa le 72 itula talu ona lē toe ola faapea foi ma laina telefoni.
Puna o Faamatalaga: https://edition.cnn.com/world/live-news/iran-protests-01-11-26
