Ua ioe le tamaita’i o Seira Malifa 38 tausaga o Nuufou ma Safotu i le moliaga o le gaoi a o avea ma tagata faigaluega i le faletupe o ANZ i le aso ananafi i luma o le Alii Faamasino ia Fepuleai Ameperosa Roma. 

E $80,000.00 le tinoitupe ua faamaonia na gaoia e lē ua molia. 

O pepa taufaasese na faia e lea tamaita’i mo nonogatupe mulimuli ane ai toe tala lava e ia i tua ia nonogatupe ma ia faaaogaina sa maua i suesuega a leoleo o le auala lea na faaaogaina e gaoi ai le $80,000.00. 

Sa faaalia e le Komesina Lagolago o Leoleo Papalii Monalisa Tia’i Keti i fonotaga ma tusitala o se tusi sa tuuina atu e le Pulega o le ANZ Bank na faatino ai loa le galuega a leoleo.

Ua atofa e le Faamasinoga le aso 2 o Mati o le tausaga nei e tuuina mai ai i luma o Justice Nelson le faasalaga o le tamaitai ua faamaonia lana solitulafono.