Ua maua mai se faamatalaga aupito lata mai ua ioeina ai e le ATAGI le tuipuipui mo tamaiti i lalo o le ta’i 5 tausaga le matutua e puipuia ai mai le Koviti-19.
O le minisita o Mark Butler, Health and Aged Care na ia faailoa o lea ua fautuaina e le ATAGI le tui a le Moderna mo le fanau lea amata mai le ta’i 6 masina le matutua.
O le aso 5 la o Setema lea ua fuafua o le a amata faia ai tui ia, muamua i tamaiti i totonu o le vaitausaga lea o le 6 masina i le 5 tausaga, i latou e iai isi faaletonu tau le soifua mālōlōina, i latou e iai mana’oga tumau.
O le a avea ai loa Ausetalia o le isi atunuu muamua i le lalolagi ua mafai ona faia tuipuipui mo tamaiti i lalo o le 5 tausaga le matutua. Ua mae’a faamautu mai foi i le lipoti lava lea e 500 afe tui ua mae’a faamautu e le faigamalo a le Feterale mo lea faamoemoe ma e amata taunuu mai i Ausetalia i le po ananei.
