O le aso 8 o le masina o Mati o le a toe tulai ai i luma o le faamasinoga sili, le tina 38 tausaga le matua o Susana Lavea Lala o Toamua mo se folasaga a lana loia ma loia a leoleo e fua iai se faasalaga, i lona ioeina lea o le moliaga o le fasioti tagata pa’ivalea, na mafua ai ona fano le ola o lana tama teine 13 tausaga le matua.
O Susana o loo molia i lea solitulafono ona o le maliu o lana tama teine na lavea le ulu i le maa ina ua togi e le tina se tasi o lana fanau, ae na maua ai le ulu o lana tama teine ma maliu ai.
O lipoti a leoleo i le tausaga na tea nei i le taimi o lumanai aso fiafia o le Kelisimasi na faaalia ai, o le ita o le tina i le lē faia e se tasi o lana fanau o faatonuga i feau e fai, na mafua ai ona ia tago i se maa ma faatino ai le solitulafono ua ia ioeina.
O loo iai se isi mataupu faapenei o loo tālia se taimi e oo atu i le faamasinoga, o se tamā na ia faia se gaioiga solitulafono o lona sasa o lona atalii ma fano ai le ola.
O se aiga i Palisi na tulai mai ai lea solitulafono i le faaiuga o le tausaga na tea nei.
