Ua ave le ioega a le Kapeneta ina ia faatino e le ofisa o le suetusi sili a le Malo, le galuega o le sueina o tusi e iloa ai le faaaogaina o tupe e ofisa o le malo o Samoa i atunuu i fafo, mo le fa tausaga ua tuanai.
O le tausaga faaletupe o loo faagasolo nei o loo faatatauina ai se vaegatupe e 25 miliona tala mo le Matagaluega o Fefaatauaiga ma le va i fafo o loo iai le vaaia o ia ofisa ma le 20 miliona tala e alu i le faatupega o ia ofisa i fafo.
Ua faailoa e le Minisita o le ofisa o le pule ma suetusi sili a le malo i se lipoti, o le 4 tausaga o se taimi umi talu ona le toe sueina tusi a ia ofisa o loo i Saina, Iapani, Ausetalia, Niu Sila, Amerika, ma Europa faapea Amerika Samoa.
O tulafono o tupe o loo aiaia ai le tatau ona sueina tupe i tausaga taitasi ma tuuina atu lipoti i le Palemene e ala mai i le ofisa o le Pule ma suetusi sili a le Malo.
