Ua sauni le tamā talavou o Edward Ulberg i se faasalaga e tusa o ala o le tulafono o soligatulafono mamafa ma matuiā, ina ua tuuina atu e lana loia lana tali ioe, i le solitulafono o le fasioti tagata pa’ivalea poo le manslaughter.
O isi moliaga e ono o lē ua molia e aofia ai le umia o se aupega mata’utia o se tamai naifi, o le faaoolima, ma le fasioti tagata faamoemoeina faapea le faia o se gaioiga solitulafono ua maliu ai lona to’alua ae o loo ma’itaga i se tagata fou e lei fanau mai. E to’afā le fanau a lē ua molia ma lona to’alua ua maliu faatasi ai ma lana pepe.
O Edward o loo nofo taofia i le vaaiga a leoleo talu mai Tesema o le tausaga na te’a nei na tupu ai le faalavelave ma molia ai e leoleo. E le’i talia lana talosaga e tatala i tua i ni aiaiga e faatali ai lona faamasinoga, peitai o le suia o lana tetee i moliaga uma ae ua ioe i le moliaga e tasi, ua faatulaga ai e le faamasinoga le aso 21 o le masina fou o Setema e lau ai lona faasalaga.
O loo faaauau pea ona nofo taofia i le vaaiga a leoleo i le falepuipui i Tanumalala.
