Ua amata faagasolo i le vaiaso nei iloiloga a le Komisi o fanua poo le Land Commission, o loo taitai ai le afioga i le Faamasino Sili, i le talosaga a nisi o matai ma aiga o le nuu o Saina i Faleata i le liliuina poo le avea o le 20 eka o fanua o le nuu o ni eleele umia saoloto poo freehold land.
O loo finau le itu talosaga ua tatau ona faataoto i se tulaga mautu lea aofaiga o eleele, ma faataatia tonu i latou e faasino iai le 20 eka.
Faaalia e le molimau a le itu talosaga na muamua faia lana folasaga i luma o le komisi o fanua, e lua faatauga o eleele sa faia ma ua taoto ai se feagaiga ua atoa nei le 150 tausaga.
O lea feagaiga ua faamautu ai le faatauina e se tasi o le nuu o se alii mai Tonga o le 20 eka, i se fefaatauaiga na faia ma nisi o matai o le afioaga o Toamua.
O lea fefaatauaiga na malilie ai e taatia atu se vaega o eleele na faatau mo le aai o le nuu o Toamua, ae fesuiai i le 20 eka o fanua o lea afioaga.
Na toe laga’i lenei fefaatauaiga ma oo i le faamasinoga ma le komisi o fanua i le taimi o pulega a Siamani ma faia ai le faaiuga i le tausaga e 1905 na mautu ai le umia e le nuu o Saina o ia eleele ma avea ai ma a latou meatotino.
Faaalia e lea molimau i luma o iloiloga a le komisi o fanua ua oo mai le taimi e faasa’o ai tagata tonu e faasino iai le 20 eka e pei ona finauina o se eleele umia saoloto.
E ono itu o loo tetee i le talosaga ma o nisi o matai ma auaiga o le afioaga o loo teena le talosaga.
E fā aso o le iloiloga a le Komisi o fanua o loo tauaveina e le afioga i le Faamasino Sili, le afioga Satiu Simativa Perese, ae o sui o le komisi ua aofia ai nisi o ofisa sinia ma se loia mai le Matagaluega o Puna’oa Faalenatura ma Siosiomaga o loo vaaia le lesitala o fanua.
Sa molimauina i taualumaga amata o galuega a le komisi o fanua le faatumulia o le potu faamasino numera tasi i le faamasinoga sili, i sui o itu auai, o loia faapea suli ma feoi o le afioaga o Saina mai atunuu mamao o loo auai i le iloiloga.
