O le lipoti lata mai o le gasegase faigata o le kanesa mo Samoa e pei ona faalauiloa e le sosaiete o loo faia polokalame e fautuaina ai le vave vaai o se fomai faapea ma le tuuina atu o fautuaga o le gasegase i le atunuu, o loo maualuga pea le numera o le itupa o tamaitai i Samoa o loo maua i le kanesa o le susu poo le breast cancer.
O faamaumauga ia ua faailoa e le Minisita o le Soifua Maloloina mo le tausaga lenei, ina ua saunoa le minisita le Afioga Valasi Luapitofanua Toogamaga Tafito Selesele, i le amatalia o faalauiloa o le Pinktober e faapitoa i le kanesa, ma ua 21 tausaga talu ona faatuina le sosaiete o le kanesa i le faamoemoe e fai ma avefeau e faalauiloa ai fautuaga e tetee ma togafiti vave ai le gasegase.
O le fautuaga foi lea mai le minisita o le galulue faatasi o tagata uma aemaise o auaunaga patino a le Malo ma faalapotopotoga tuma’oti o loo taulamua i le ave o fautuaga e faatatau i le gasegase.
E pei ona silafia o se tasi lea o gasegase o loo aofia i le polokalame fesoasoani a le Malo o loo auina ai i fafo nisi ua aafia ai mo togafitiga.
O le Pinktober o se polokalame faalauiloa e laei ai le lanu piniki ma faatino ai foi sailiga seleni a le sosaiete o le kanesa e faatupe ai a latou polokalame faalauiloa o le gasegase.
