O le manumalo o le vaega faaupufai o le Faatuatua i le Atua Samoa ua Tasi i nofoa e tolu o Siumu, Faleata 4 ma Vaa o Fonoti i palota laiti ua mae’a, ua faamautu ai le umia e le itu faaupufai a le Faigamalo fou, o nofoa e 35 ma ausia ai lo latou umia o le lua vae tolu o nofoa e 52 o le paeaiga lona 17 a le Palemene o iai nei.
O le feiloaiga i le Aso Toonai na tea nei a ia itumalo ma o latou sui faipule filifilia ma le taitai ma sui o le vaega faaupufai o le Faatuatua i le Atua Samoa ua Tasi, na faamanatu ai e le taitai le tāua o le lua vae tolu ua umia e le latou pati faaupufai, ae o se faamanatu tāua foi lea ia pule ma le amiotonu.
Le Afioga Fiame Naomi Mataafa o le Palemia ma le taitai o le vaega faaupufai o le Faatuatua i le Atua Samoa ua Tasi.
Na tapena e itumalo o Siumu, Faleata 4 ma Vaa o Fonoti faaaloaloga masani faaleaganuu na faasopolia uma ai le pati faaupufai ina ua tatala ie o auafa ma ie o moega lafo faapea seleni sa maau iai sui faipule ua toe filifilia ma o latou itumalo faapalota.
O le Aso Lua asau e usuia ai le Fono aoao faitulafono lea o le a faatauto ai ma le tofa Ale Vena Ale, tofa Ma’uu Siaosi Puepuemai ma le fetalaiga Tu’uu Anasii Leota.
