Gau le silia ma le $100,000 a le tina 84 tausaga ona o faiga taufaavalea e tauala mai i luga o le Facebook.

O lea na hack e le au gaoi le Facebook account a le faauo a lē ua aafia ma tauanau e lafo atu lea vaega tupe ina ia maua ai isi tupe e sau mai le Covid-19 subsidy payment.

E ui o lea na maua uma e le faletupe a le ASB faiga taufaavalea nei ma le faa-13 ona lafo tupe i atunuu mamao, e oo mai i le asō e lei toe maua mai lava se sene ma ua lē fiafia ai le aiga o lea tina matua i le faatamala o le faletupe.

O loo teena e le ASB o lona faatamala lea ua mafua ai, ma o lea lava foi na gaioi e fua i luga o tuugatala ma le tina ua aafia e aua le logoina leoleo poo lona aiga.

Ua suesue nei e le gata e leoleo i Niu Sila ae faapea le ofisa o leoleo i Ausetalia i lenei mataupu.