Ua tele tausaga o faipaaga se tasi o ulugalii mai Ausetalia ma nisi o faifaaotaga koko i le motu tele i Salafai lea o loo mafai ona auina atu ai le koko Samoa mo le gaosiaina o sukalati i Melepone Ausetalia.

O le susuga ia Phoebe Preuss o ia lea o loo pule i se pisinisi ua ta’ua o le Living Koko e gaosia ai le sukalati ae le gata i lea o nisi o oloa o loo mafai ona gaosia mai le koko.

“O le auaunaga o loo faatino i lenei pisinisi e aofia ai nai mea taumafa e gaosia mai le koko, o vaiinu aemaise ai o fagu e faaaogāina mo le tausia lelei o le tino ia maloloina lelei.

“Ma o mea o loo manaomia ona gaosia ai nei oloa gaosi e auina mai lea mai Samoa mai le 400 o faifaatoaga e aofia ai ma Toga, Fiti ma Niue ma e gaosia lava i totonu o Melepone i Ausetalia.”

Na ta’ua e Preuss le faigapaaga ma nei faifaatoaga.

Sa ou ola a’e i Samoa ae fai lava ma asiasi i aiga uo aemaise nai faifaatoaga koko o loo fesoasoani mai lenei pisinisi.

“O se tasi o matou paaga ua leva ona matou galulue o le susuga ia Saleimoa ma Rosie Vaai mai Savaii, sa faavaeina mai lea i se polokalame o fefaatauaiga sa faia e le Pacific Trade and Invest.

“A o lei maua le fesoasoani mai le faalapotopotoga o atina’e ma pisinisi a tina ma tamaitai poo le Women in Business Development Inc e ala lea i le auina mai o fatu mai nai faatoaga laiti i nisi o afioaga.

“O loo matou galulue foi ma se sui faavae o le Ms Sunshine Farms Susuga Floris Niu e ala lea i se tour i le masina o Setema ua ta’ua o le Samoa Koko.

“E faalauiloa ai foi faatoaga o loo maua e faaaogā e gaosia ai le sukalati ma nisi oloa gaosi.”

O nei koko e faalala muamua i le nofoaga o loo iai le Savaii Koko i le afioaga o Asau a o lei auina atu i Ausetalia.

O le faamoemoe lava ina ia mafai ona fesoasoani i faifaatoaga koko e ala lea i le maua ai o seleni i le faatauina atu i fafo o le koko.