O loo i Samoa nei sui mai le ofisa o loo gafa ma le tapu o fualaau ma vailaau o loo faaaogāina e tagata taaalo mai Korea poo le Korea Anti Doping Agency (K.A.D.A.) e faatino se tasi o vaega o le faigapaaga ma le vaega o loo faatinoina lenei auaunaga le Samoa Medical & Anti-Doping Agency.

O le isi lenei o laasaga ua oo ai lenei faigapaaga ua mafai ai ona oo mai sui nei e molimauina ma silasila i le tulaga o le faatinoina o le auaunaga a le S.M.A.D.A.

Ta’ua e le Taitaifono o le S.M.A.D.A. Natanya Potoi o se vaega tāua lenei i le faagasologa o polokalame a i latou o loo faatinoina lenei galuega.

“O le poloketi lenei o loo aumai ai sui mai Korea o le a galulue faatasi ma ia faaleleia le tulaga o le gafatia o vaega e moomia e faatino ai le galuega.

“Mo le silafia i le faatinoina o lenei process e toatasi le tagata taalo e silia ma le $500 tala Amerika e faaaluina ai e aofia ai le lafoina poo le courier, o le tau o loo suesueina ai i labatory, o equipments ma le tele o isi mea.

“Ae peitai e faafetaia ai le K.A.D.A. ua ofoina mai le fesoasoani e faatupeina le 40 o test samples mo le autaaalo a Samoa lava ia aemaise i le auiliiliina o nei test lea e na o le lab i Seoul e faatino ai.

“O se faamāmā avega sili lea mo Samoa e fua i le taugata ona faatupe o nei test e le tagata e toatasi ona mo le silafia e leai se tupe faaagaga mo le faatinoina o test nei.

“O le auai mai o le K.A.D.A. o se faailoga lea o le tautinoga lea o le faigapaaga ua faia ua molimau ai i le faatinoina o galuega a i matou nei.”

O Samoa o le atunuu lea a le Pasefika na faamanuiaina i lenei poloketi mai le Oceania faatasi ai ma le atunuu o Nepal mai le atu Asia.

O le oo mai ai la o sui mai le K.A.D.A. ua fetaui tonu lea ma le faamoemoe o tuugavaa faavaomalo o loo faagasolo nei lea o loo auai ai sui a le S.M.A.D.A. e faatino ai test i tagata taaalo.

E pei ona ta’ua e Kijoo Han mai le K.A.D.A. o se tulaga mataina le maualuga o le faatinoina o le auaunaga e sui i Samoa nei o lenei galuega.

“E lei atoa se aso o le aoaoga sa ma faatautaia mo sui nei o loo ua iai le tomai ma le agavaa i le faatinoina o le auaunaga ona sa ma molimauina lava le tele o le malamalama o loo faatino ai operations i tagata taaalo.

“E tulaga ese mai la ia Nepal sa tele se galuega sa faia ai ona e lē o tele le tomai i ona sui galulue.

“E talitonu o lea faaauauina pea lenei faigapaaga ma Samoa ina ia mautinoa le saogalemu o sui taaalo mai le faaaogāina o fualaau ma vailaau e solia ai tulafono ua mae’a faataatitia.”

Faailoa e Potoi o le faatinoina o nei auaunaga e faailoa ai foi le usitaia e Samoa o tulafono ma faiga faavae a le Vaega o loo gafa ma le tapu o nei fualaau ma vailaau a le lalolagi poo le World Anti-Doping Agency (W.A.D.A) ae o loo usitaia foi e le Malo o Samoa faiga faavae o le tetee atu i le tagofia o fualaau ma vailaau e sui taaalo i lalo o le tauaofiaga a le faalapotopotoga a Malo Aufaatasi i le itu tau i aoaoga, faasaienisi ma aganuu.