O le Aoga Tulagalua a le afioaga o Afega o se tasi lenei o aoga ua oo ai le polokalame a le Vaega o Fomai Nifo mai le maota gasegase o Tupua Tamasese Meaole i Motootua ma o loo galulue faatasi ai ma le fomai nifo mai Iapani o Yukiko Motoe ina ia faatino le siakiina o oloa o alo ma fanau.
O le auaunaga o loo faatinoina Motoe sa ia galue ai i le tele o tausaga i lona atunuu.
“O le umi ona ou iai i lenei auaunaga o se fiafiaga tele lea ia te au e faasoa ai le tomai faapitoa ma faatino foi le sao mo le soifua maloloina o alo ma fanau a Samoa.”
O le lagolagosua a lenei tamaitai fomai i le auaunaga a fomai nifo o se vaega tāua lea e pei ona faailoa ai i lenei polokalame.
I le mae’a ai ona siakiina le silia ma le 400 o alo ma fanau aoga, e silia ma le kuata o le fuainumera o nei fanau o loo manaomia ai le fesoasoani i le faaleleia o oloa ma o le fiafiaga foi i fanau aoga o le faatino ai o le auaunaga e aunoa ma se totogi ma le oo atu ai o lenei polokalame i o latou faleaoga.
I pepa o faamatalaga mai le Ofisa o Iapani i Samoa nei poo le Japan International Coperation Agency (JICA), o loo feagai pea Samoa ma le faafitauli o le lē siakiina o oloa o alo ma fanau mai le 1-9 tausaga e tusa lea ma le 46.6 pasene le fuainumera o alo ma fanau o loo aafia ai e pei ona iai i faamaumauga a le Faalapotopotoga a le Soifua Maloloina a le Lalolagi.
E pei o se tasi o vaega o loo iai i lenei pepa o faamatalaga, e tusa ai o le toaitiiti o le fuainumera o fomai nifo o loo fatinoina le auaunaga i le atunuu faatusatusa i nisi o atunuu.
