O le a’oa’oina o tomai faafoma’i i totonu o le Iunivesite Aoao o Samoa, o se tasi o matati’a ua ausia i a’oa’oga faaauau i le iunivesite a lo tatou atunuu, ma ua toatele tamafanau a Samoa ma le Pasefika ua faauu ai i faailoga maualuluga.
O se tasi o tomai faafoma’i o loo a’oa’oina ai, o le togafitia lea o gasegase tau ponaivi, ma o le faauuga a le Iunivesite i le masina na tea nei o Mati e toalua foma’i na faauu ai i faailoga i le faatinoina o togafitiga tau gasegase o ponaivi, o i laua ia le susuga i le alii foma’i o Dr Areta Samuelu mai Samoa, ma Dr Peter Sovanivalu mai Fiti.
Ua faaalia e le pulega o le Iunivesite o le taimi nei e toa 24 i latou o loo aooga faafoma’i ma o nisi e mai atunuu eseese o le Pasefika, o se manulauti tāua lea i le siitia pea o tulaga tau aoaoga faafoma’i i le Iunivesite Aoao a Samoa.
Ua mafai ona faalautele pea a’oa’oga faafoma’i tau i gasegase o ponaivi ona ua galulue faatasi le iunivesite ma le asosi o togafitiga tau i lea tomai faafoma’i na faavaeina i le atunuu o Solomona, lea foi na faamanuiaina le taumafai o nisi mai lea atunuu i faailoga faafoma’i mai le iunivesite a Samoa.
