O le soifua maloloina o se tasi lenei o vaega o loo ave iai le faamuamua a le Malo e ala i le soifua manuia o ona tagata, o le manulauti foi lea o le a galulue faatasi ai ma le Malo o Amerika e tauala mai i le faigapaaga ma le U.S. Army Reserve e faatino auaunaga faalesoifua maloloina.

I pepa o faamatalaga, o le falemai i Poutasi ma Leulumoega o le a faatino ai lenei auaunaga lea e galulue soosootau’au ai ma le Soifua Maloloina a le atunuu.

O lenei fesoasoani ua faaigoaina o le Soifua Manuia o se vaega lea o galuega o loo lagolagoina e le Malo o Amerika i tagata o le atunuu o le faailoga lea o faigapaaga a Malo e lua mo le manuia o ona tagata.

Na ta’ua e le sui o le Malo o Amerika i Samoa nei, Noriko Horiuchi o le fiafiaga tele lea o le a maua ai le avanoa e faatino ai lenei auaunaga.

“O lenei fesoasoani o se itu lelei lea faailoa ai le vavalalata o le faigapaaga a Samoa ma Amerika e mafai ai ona faasoa le auaunaga ina ia manuia le soifua lautele o le atunuu.”

O lenei auaunaga o le a faia ai siaki ma togafitiga ia mautinoa le soifua puipuia lelei o tagata.

O i latou o loo iai le tomai faapitoa i nei auaunaga faalesoifua maloloina o le a faatinoina lenei tautua ma o se tasi lenei o fesoasoani mai le tele o fesoasoani o loo faatino e le Malo o Amerika mo Samoa.

O le vaiaso nei o le a amatalia ai lenei auaunaga.