E valu vaiaso o lea ua faatinoina ai se polokalame a le matagaluega a le South Seas Healthcare e faatāua ai le faalaloina o le toto maualuga ma le suka ma le tele o ma’i o loo maua ai o tatou tagata. 

O lenei polokalame ua mafai ona galulue faatasi ai lea auaunaga ma le afioga ia Faumuina Toaletai David Tua e ala lea i le faia o faamalositino i le hall a le Te Puke i Otara. 

O Aso Faraile o vaiaso taitasi o loo faia ai toleniga boxing i le 6 i le taeao. 

O le taulamua o le matagaluega o le South Seas ona e iai le manatu o le pulega e tatau ona amata mai i fomai ma tagata o le matagaluega le maua o le soifua maloloina i soo vaega o le soifua i le tino, mafaufau ma le agaga. 

Ua tolu nei vaiaso talu ona faagasolo lenei polokalame ma o loo maitauina ai i Aso Faraile le toatele o nai tagata matutua ma fanau faapea tupulaga o loo agai atu e fai le faamalositino. 

Ta’ua e le susuga ia Seumanu Mikaele e faapea, e ese le tāua o lenei avanoa mo tatou tagata, auā o le taumālūlū lea ua iai, na o le faigaluega o i le fale, aai ma mālōlō, ma e leai se avanoa e tatau ai ona fai se faamalositino e saili ai le malosi. 

Ae faafetai i le pulega a le South Seas Healthcare ona o lenei avanoa tāua, e ui i le faigata o le taimi e usu ai i le mālūlū e faatinoina lenei polokalame ae e iai le telē o lona tāua i le tagata soifua. 

Ma e fai i le loto le taaloga.