E iai le itu e penefiti ai se vaega o fanau mai le vaevae o fanau i vasega e fua i le maualuluga o taumafaiga i totonu o potuaoga, peitai i le aotelega e le o manuia ai le toatele ma o le tala faanoanoa o fanau Maori ma Pasefika lea o loo aafia ai.
O le aso ananafi ua faalauiloa ai le fuafuaga fou o loo taitaia e tagata Maori ua ta’ua o le Kokirihia ma o lea o loo iai faatasi le matagaluega o aoga, o taitai iwi, New Zealand Qualifications Authority, ofisa o loo toe iloiloina o aoaoga, Post Primary Teachers’ Association ma le tele o kulupu.
I le taimi nei o le silia ma le 80% o aoga o lea o loo faaaogaina le faiga lea e tuu eseese ai fanau aoga e maualalalo taumafaiga i vasega maualalalo, ma peiseiai ua maualalo ai aoaoga e tuuina atu i fanau ma atili telegese ai lo latou ola saili.
O le 2021 na folasia ai i luma o le Palemia Chris Hipkins a o avea lea ma minisita o aoga i lea taimi, faamaoniga o le leai o se faiga tutusa i le faiga lea e tuu eseese ai fanau e vaivai taumafai ma fanau ua maoa’e taumafai i totonu o potuaoga ma o fanau Maori ma Pasefika atoa ai ma i latou e iai manaoga faapitoa lea e telē lo latou aafiaga mai fetuunaiga nei.
O le taumafaiga na faalauiloa ananafi o loo sau ai o le 2030 e tatau ona oo atu iai ua le o toe faaaogaina e aoga i totonu o Niu Sila, ma mai ia i latou o loo tuufaatasia e lava lea taimi mo tapenaga aemaise lava i faiaoga.
