Ua silia ma tausaga le faigapaaga a itumalo nei e lua na faavaeina mai i le polokalame i galuega faavaitaimi lea oloo tele tagata Samoa ua manuia ai.
I se pepa o faamatalaga, o loo faailoa ai o le masina lenei o le a fuafua e faimalaga mai ai le Pulenuu o Hastings Sandra Hazlehurst faatasi ai ma nisi o sui mai le itumalo ma pule o kamupani o loo galulue faavaitaimi ai tagata Samoa e faataunuu lenei faamoemoe.
O lenei maliega o le naunautaiga lava ia tele ma faatumauina pea faigapaaga a itumalo e lua ina ia atina’e ai soifua o tagata ma tamaoaiga.
Na saunoa Hazlehurst o lenei foi maliega e tai ogatusa ma le vaitaimi o le afā o Gabrielle lea na telē le aafiaga i faatoaga sa galulue ai tagata Samoa.
“Sa tele se aafiaga na oo iai faatoaga ina ua faaleagaina e le afā o Gabrielle ma e lavea faatoaga ua oo i le taimi e selesele ai ma o se tulaga faanoanoa lea i pisinisi ona o le tulaga o le tamaoaiga.
“O le polokalame o galuega faavaitaimi o loo tuuina mai lo latou sao tāua tele i le atina’eina o faatoaga i Hastings ma o lenei faigapaaga e faaauauina pea ma ia aua ne’i muta ai lo tatou galulue faatasi.”
E 150 i latou mai Falealili sa malaga atu i se taimi e lei leva atu ma o loo galulue nei i Hawkes Bay.
O le afioaga o Poutasi o se tasi lenei o afioaga o loo mauaa la latou faiga faapaaga ma nisi o kamupani o loo maua avanoa faigaluega faavaitaimi e pei o le Yummy Fruit Company.
O Hastings o le vaega tele lea o Niu Sila o loo lolofi ai le tele o i latou o loo galulue faavaitaimi ai.
