O le uluai taimi lenei o le a toe feiloai ai Minisita ma Sui o ofisa vaaitau i le Pasefika i le fonotaga masani lona 6 (Pacific Meteorology Council) talu mai le lua tausaga o le tapunia ai o femalagaa’iga ona o le faamai o le Koviti-19.

E pei ona faailoa mai i faamatalaga a le Ofisa o le Siosiomaga a le Pasefika (S.P.R.E.P) o le fonotaga lenei e aofia ai ma le fonotaga lona 3 a Minisita o loo patino ai ofisa o vaaitau i le Pasefika ma se tasi o fonotaga a paaga ma i latou o loo fesoasoani i atina’e tau vaaitau lea o loo faia uma i Fiti.

O le autu o le vaiaso o nei fonotaga o loo autasi uma i auaunaga faaauau i vaega o vaaitau, suavai ma ogasami mo se Pasefika saogalemu.

Ta’ua e le Faatonu a le Vaega o Suiga o le Tau, Tagaloa Cooper le ta’ua ai o nei fonotaga.

“O le fonotaga lenei a ofisa o vaaitau i le Pasefika e fai tele si ona tāua i auaunaga o loo moomia i suiga o le tau ma o se alafua mo le agai i luma o le faatinoina o auaunaga tau vaaitau i le Pasefika o loo ogatasi ai ma fuafuaga i auaunaga tau vaaitau a le lalolagi.

“O se avanoa tāua e faasoa ma talanoaina mataupu auā le agai luma o auaunaga tau vaaitau i le Pasefika e le gata i lea o auala faatekonolosi lea e fesoasoani tele i nei auaunaga.”

 O Samoa sa talimalo i le fonotaga lenei lona 5 i le 2019, ma sa fuafua o le a talimalo le Atu Kuki i le 2021 ae peitai ona o le pepesi ai le faama’i.