O Michael Lemme o se tasi o fomai nifo i le Malo tele o Amerika lea o le a faimalaga mai i Samoa i le vaiaso fou ma faamautu ai ana polokalame i le falemai i Pesega mo i latou e manaomia le fesoasoani i le siaki o nifo ma tuuina ai fautuaga mai i lenei fomai.
Na ta’ua e Lemme o se taimi muamua lea o le a malaga mai ai ma lona aiga o i latou o loo fesoasoani i le faia lea o polokalame e faatatau i le soifua maloloina o nifo o soo se tagata.
“O Pesega lea o le a faamautu ai la matou auaunaga ae o loo iai aoga ma nisi o nofoaga o le a oo atu iai lo matou aiga e faatino.”
O le tausaga e 2020 lea na fuafua e malaga mai ai ma lona aiga ae peitai ona ole faamai o le koviti sa le faataunuuina ai.
“Sa iai se tasi o uo fomainifo na malaga mai Samoa i le 2018-2019 o Frank Pitcher sa tautua ai foi i Samoa e ala i tiute faafomai nifo.
“Ina ua toe foi atu na ia faamatala loa i le matagofie o Samoa aemaise o lana auaunaga sa faatino ai.
“O i la lea na faaosofia ai loa a’u e matou te asiasi mai i Samoa i le 2020 e mae’a totogi a matou pasese ae tapunia loa ma alavaa i lena tausaga ona o le faama’i lea ua toe sologalelei femalagaa’iga lea la o le a faataunuu ai i le masina nei.”
“Ua maua ai foi ma le avanoa e tafafao ai i Samoa mo ni vaiaso ma faatino ai le auaunaga o loo iai nisi foi o faamomoli o loo tapena i le taimi nei mo fanau o le a oo ai la matou polokalame.”
O Lemme o loo galue lava ia i lana falemai i Uosigitone ma lana aufaigaluega ma o se fiafiaga lea ia te ia ma lona aiga o le a faataunuu ai la latou malaga mai i Samoa.
