O loo iai se alo o le atunuu o loo fuafua e toe faimalaga mai i Samoa i se taimi lata mai e faataoto le fuafuaga o le fausia ai o se fale faamalositino e fesoasoani ia i latou o loo taaalo i soo se faagatama i le atunuu.
O le susuga ia Aumauinuuese Sioeli Puni o loo aumau nei ma lona aiga i Hawaii ae o loo fuafua e malaga mai i Samoa nei e faataunuu pea se falemai mo manu’aga o tagata taaalo a le atunuu.
“O loo fuafua e faatinoina se falemai tuma’oti mo tagata lautele e patino lea i itu tau taaloga mo le physio, ocean, rehab, toleniga ma le saogalemu mo soo se tagata taalo.”
“O loo iai a ma tou masini e fesoasoani e toe faafoisia ai le malosi o le tagata taalo mai i manu’aga o le tino.”
Na fesiligia le tulaga i le faatupeina o lenei poloketi.
“Mo le taimi nei o loo faatupe lava i tupe a lo’u aiga ma nai fesoasoani laiti ae mo le alualu iluma i le tulaga e ao ona iai le auaunaga e tusa ma le miliona lona faatupeina e pei o auaunaga a atunuu i fafo.
Na ia ta’ua ai le faanaunautaiga ia mafai foi e alo ma fanau a Samoa o loo taaalo i atunuu mamao ona lagolago mai i lenei taumafaiga.
“E le na o se auaunaga e na o a’u, e mo i latou o loo fia foi mai i Samoa e tautua si o tatou atunuu i soo se itu e mafai ai ona fesoasoani.”
“O ai lava e fia togi maa mai i lenei poloketi ou te le taofia ae o le agaga lava ia avea foi sia taumafaiga e atiina’e ai le itu tau taaloga i totonu o le atunuu.”
O Puni ma lona aiga o i laua lea o le a amataina lenei auaunaga ma le famoemoe e faafaigaluega ai nisi pe a mautu.
“E manaomia le aufaigaluega ia ae iloa foi o le itu tau seleni lava e vaavaai iai, o lo’u toalua ma a’u nei lea o loo vaavaalua nei e tautua mo le taimi nei ona iai lea o le fuafuaga e faalautele atu pe a lelei le atina’eina o lenei fale.”
A mae’a ona fausia lenei fale o loo iai le fuafuaga e oo atu ai le auaunaga i le malo, o aoga aemaise le mamalu lautele o le atunuu e fesoasoani ai i le itu tau le soifua maloloina.
O loo matou tulimata’i lava la matou manulauti ia mafai ona fesoasoani lenei auaunaga i ē o loo moomia mo se totogi e lē telē.
“Mo le silafia o le vaitau lenei ua atia’e lava o tatou tagata i le lava o le seleni e ui ina eseese foi le tamaoaiga a si o tatou atunuu ma atunuu tetele.”
“E le o se faamoemoe e faigofie ona faatino ae peitai o le tatalo lava ia mafai ona tatou galulue faatasi e taunuu manuia ai se galuega.”
