O le masina fou lea o loo fuafua e toe faimalaga mai ai se aumalaga mai i se tasi o kamupani o loo iai le tomai i le siakiina o le faalogo i Niu Sila poo le Bay Audiology, mo le toe faaauauina o lenei auaunaga i le mamalu o le atunuu.

O lenei polokalame e ta’ua o le Free to Hear – Samoa Programme  sa amatalia mai i le tausaga 2016 na ta’ua ai le fomai o loo gafa ma lenei vaega, Annette Kaspar e tusa ai ma le toe malaga mai ai o lenei kamupani e faaauauina la latou auaunaga.

“Ua tele tausaga o faatino e le vaega lenei mai Niu Sila lenei auaunaga ae o se taimi muamua lenei o le a faatino ai i totonu o le tatou maota gasegase, i le tatou vaega lea a le ENT Clinic lea e gafa ma le siakiina o le faalogo.

“Ona o le tulaga i le koviti sa le mafai ai ona toe faaauauina lenei auaunaga ae peitai lea o le a toe malaga mai i le masina fou e faia ai lenei polokalame.

“O le ala lena sa tuuina atu ai e le Matagaluega se faasalalauga i luga o upega tafailagi, poo ai lava o le mamalu o le atunuu o manaomia lenei auaunaga e muamua ona afifio mai e siaki foi le tulaga o le soifua maloloina o taliga ina ia lava tapena ai mo lenei polokalame.

“O le vaega fou la lena o lenei polokalame ona a lē mamā ona fufulu taliga e lē mafai ona tuuina mai e le vaega lea e gafa ma le polokalame se mea faalogo o le tulaga lea e tatala ai le avanoa e afifio mai.”

Na ta’ua e Kaspar ua toatele sa mafai ona agai atu auā le vaega muamua e faatinoina a o lei oo i le aso o le polokalame.

E toafitu i latou o loo malaga mai i lenei aumalaga ma e tolu aso oloo fuafuaina e faatino ai la latou auaunaga.