Ua faaata mai e le faigamalo a le Feterale i le vaiaso nei le faia o nisi tulafono fou e malosi atu agai i le faaaogaina o le faiga o le buy now pay later BNPL lea ua toatele tagata ua faaaogaina aemaise lava i tupulaga talavou mo a latou faatauga.
O le faamatalaga sa faia i le aso ananafi e le minisita o mataupu tau tupe Stephen Jones ua ta’ua ai suiga ma lapataia ai le atunuu aemaise o le auaunaga lea o le a feagai foi ma nisi o tuutuuga e pei ona manaomia ona faia mo le maua ai o se credit card poo se nonogatupe foi.
Fai mai le minisita e mananao i tagata ina ia faamautinoa o loo sa’o mea o loo faatulaga e puipuia ai i latou mai ia auaunaga. O le BNPL lea e aofia ai ma le auaunaga a le Afterpay ma le ZIP o nisi ia o auaunaga aupito i taatele i tulaga o faatauga i nei aso.
O nisi la o vaega ua faaata mai e le malo o le a ono faia i ia auaunaga e aofia ai le faia o Credit checks mo tagata e fia faaaogaina le auaunaga.
O nisi finagalo faaalia o tagata i lea mataupu ua ta’ua ai o loo lelei lava le faagasologa o ia auaunaga i le taimi nei, o loo faigofie ma tali foi i le toatele i le taimi e manaomia ai ni faatauga ae le o a’ua’u le faasoa.
Fai mai nisi e tetee i faiga a le malo o loo tau faailo ane ona e tatau ona pule le tagata ia i le faaaogaina o ana tupe ma le auaunaga e manao e faaaoga ai.
