Ua fono i le Aso Tofi o lenei vaiaso sui o le soa komiti filifilia a le malo o loo aofia ai ma nisi o Minisita o le Kapeneta, mo le talanoaina o faafitauli eseese ua tutupu ma aliali mai i galuega faavaitaimi, ma faatulaga ai se isi faiga e fofo ai ia faafitauli, aemaise o le itu i le sailia o tagata tonu e tatau ona agavaa i ia avanoa faigaluega i Niu Sila ma Ausetalia.
Ua faailoa e le minisita o faatoaga ma faiga faiva o loo iai i le soa komiti, e ui ina faigata le faaiuga ua faia e taofia mo se taimi le tumau le malaga i galuega faavaitaimi o o tatou tagata mo le masina lenei o Ianuari, peitai e tāua le faia o lea tulaga ae sei soalaupule lelei ni aiaiga e le gata i le sailia o tagata faigaluega, ae ia taofia faafitauli ua aafia ai ulugalii ona o ia galuega, ae o le faaletonu ua aafia ai ma galuega i Samoa ona ua malaga ai ma i latou ua iai agavaa aoaoina mo galuega i lo tatou atunuu.
Ua faailoa e le minisita le susuga Laauli Leuatea Polataivao Fosi Schmidt, e lei faigofie i le Kapeneta ona faia le taofiga le tumau mo le masina lenei o Ianauri e le toe tuua ai Samoa e ni aumalaga mo galuega faavaitaimi, ae sei saili ni fofo i le mau faafitauli ua tutupu ma aliali mai.
Ua ia faailoa foi o lea ua silasila nei le Malo ua tatau ona tuuina atu le filiina o tagata tonu e agavaa mo ia avanoa faigaluega i le vaaiga a itumalo lea ua tapuvaetasi iai le poloketi o le tasi le miliona, aua o le isi lea faiga lelei e mataitu ai tagata e malaga mo ia galuega.
