Ua i luma nei o le Kapeneta le lipoti a le komisi suesue o faigapalota ma le faamoemoe o le a tuuina atu i le Fono Aoao Faitulafono mo le lauliliuina.
O se lipoti na faaalia e le taitai o le Malo ua iai fautuaga i vaega eseese mo le agai i luma mo le faaleleia o faigapalota a le atunuu e saili ai tofi o itumalo i le Palemene.
Ua i luma foi o le Kapeneta se tulafono taufaaofi mo le faia o le pepa e iloagofie ai tagata taitasi poo le National ID card lea ua lima tausaga o faagasolo ona tapenaga.
O lea tulafono taufaaofi ua faatulaga ai aiaiga faaletulafono e limataitaia ai vaega uma o le a faatino mo lea ID, ma ua faailoa e le tamaitai Palemia o se tulaga lelei i le agai atu i le lumanai e mafai ai ona maua faamaumauga o tagata uma mai lava i le taimi faatoa soifua mai ai, ma faafaigofie ai ona tapa auaunaga tau falemai, aoaoga, pisinisi o fefaataua’iga ma ni faamaoniga e moomia mo isi auaunaga e masani ai le atunuu.
O le a tuuina atu foi i le Palemene lea tulafono taufaaofi mo le talanoaina.
