Ua iai nisi o auala ua folafola o le a faia e fesoasoani ai e tau tuuitiitia lu’itau o loo feagai ma le soifua mālōlōina i le atunuu, ae manatu nisi o tagata atamamai i le auaunaga e mana’omia lava ona faia nisi gaioiga faaopoopo.
I le lipoti a le televise tasi i le asō o loo ta’ua ai o le faaitiitia o le aufaigaluega i le soifua mālōlōina i ona vaega uma o se tasi lea o lu’itau tele ma ua ta’ua i le lipoti ua folafola mai ai nei auala e pei o le a’oa’oina o nisi tagata faigaluega tau le soifua mālōlōina e galulue i le atunuu ma le aumaia o nisi foma’i faaopopo ma tausimai.’
O le isi tulaga e pei ona ta’ua o le faafaigofie lea mo tagata faigaluega mai atunuu i fafo ona lesitala mai i Niu Sila ma o le a saunia foi e le malo vaegatupe e 5 afe mo tausima’i i Niu Sila nei e toe fia foi i le auaunaga ma o le a fesoasoani ai le malo ina ia lesitala.
Fai mai le minisita o le soifua mālōlōina Andrew Little o le faiga lea o le a fesoasoani foi mo le itu tau femalagaa’iga ma le lesitalaina o tagata faigaluega uma i le soifua mālōlōina. O se fuafuaga ua talia lelei e le to’atele ae ta’ua e nisi i le auaunaga e mana’omia pea nisi gaioiga e faia ae o le itu sili ua iai se faatatau e faia se suiga i le tulaga pagatia o loo iai nei le auaunaga.
