Ua faaagaaga e le malo le 192 miliona i nisi o poloketi eseese i le atunuu o loo fuafua e mafai ona maua ai le silia ma le 11 afe o fale fou i totonu o le isi 15 tausaga o sosoo mai. 

O le tupe lea e sau mai le Government’s Infrastructure Acceleration Fund poo le IAF. O se vaega lea o le 3.8 piliona mai le Housing Acceleration Fund lea na folafola i le tausaga talu ai e agai sao i le foia o faafitauli e pei o paipa, auala ma sootaga o le suavai palapala, e faatuai ai ona fausia fale fou.

Ua lipotia foi le saunia ane e le malo o le 36 miliona mo le suavai ma le faaleleia o femalagaa’iga i Nelson atoa ai ma isi foi fesoasoani mo poloketi faaauau a le malo i vaega eseese o le atunuu.

E silia ma le 200 talosaga ua maua atu mo le faaaogaina o ia poloketi ae ua ta’ua mai e toe faalauiloa mai foi isi poloketi i le faaiuga o le tausaga nei ma le amataga o le tausaga fou.