Ua folafola e le vaega faaupufai a le ACT e tauala mai i lo latou taitai, David Seymour, faiga faavae a le pati e faatatau i soligatulafono ogaoga o sauaga e aafia ai tagata faigaluega.
O lea faiga faavae na faailoa i le tautalaga a le taitai sa faia i se dairy i Mt Roskill i le aso ananafi, fai mai a ia e tatau ona faatino tiute o tagata faigaluega e aunoa ma se fefe.
O soo se gaioiga e pei o le gaoia o se falefaigaluega e feagai ai le tagata faigaluega ma se faamata’u.
Ua tele tulaga faapea ua aafia ai nai tagata faigaluega e pito i luma i auaunaga i osofaiga ma sauaga e faia e le au osofai.
Fai mai Seymour o le a faatino e lana vaega faaupufai se suiga i le Sentencing Act 2002 pe a tulai mai, ina ia manaomia ai le matuai silasila o faamasino i soligatulafono ogaoga e sauaina ai se tagata faigaluega a o faatino o latou tiute.
