E silia i le tasi miliona tala Samoa le foai a le Malo o Iapani mo le Matagaluega o Leoleo, Falepuipui ma le Olatoefuataina na molimauina i le aso ananafi.
O lea foai o poloketi e lua, o taavale e 14 e tusa lona tau ma le $353,988.00USD tusa lea ma le $909,750.00, e 10 taavale ua tuuina atu i le Matagaluega o Leoleo, ae 4 ua tuuina atu i le Vaega o le Falepuipui ma le Olatoefuataina, faatasi ma le hall o le a fausia mo le Falepuipui i Vaiaata, e tusa le tau ma le 312,937.00 USD e tusa lea ma le $804,249.00.
O le alii Minisita ia Faualo Harry Schuster na faafetaia le Malo Iapani e ala i lea foai, ma faailoa ai le manaoga ua leva ona tuuina atu e le Matagaluega e manaomia ni taavale se 30 auā le faagasologa o galuega a leoleo mo le saogalemu o le atunuu.
O taavale e aofia ai pikiapu o le pasi ma le loli la’u uta, ae o le hall ua fuafua e fausia mo le Falepuipui i Vaiaata o le a iai se fata mo polokalame faatino a pagota, o se umukuka, o le potu e teuina ai metotino, o faleleta’ua ma faletaele ma se tanevai mo pagota.
Ua faaalia foi e le alii Minisita o le amataga lea o latou tapenaga mo le fono o Malo o le Taupulega i le Tausaga Fou lea ua faatalatalnoa ma faatagi atu ai ia latou paaga nei.
