O le aiga o Wally Miur mai Niu Sila o le lona lua ai lea o la latou fesoasoani i alo ma fanau aoga a le Kolisi a le Itu o Tane i Salafai.

Na saunoa ai le susuga i le Pule Aoga o le Kolisi, Allie Faletolu e tusa ai o lenei fesoasoani ua taulimaina.

“E lei mafaufauina o le a toe afea le Kolisi e si tamalii foi ma lona aiga, o le malaga muamua mai a si aiga lea e aumai lo la alo i taamilosaga aau a le Swim Series a Seti Afoa ma faavae ai loa la matou masaniga.

“O le meaalofa sa foaiina mo le aoga i le taimi muamua o tusi aoga ma nisi resources mo le aoga e faapea foi la i le taimi nei o tusi aoga, api, peni ma nisi o mea e fesoasoani i aoga a le fanau.

“E lagona ai foi le loto faafetai i lenei fesoasoani ma e ese ma le tāua ia te au o tusi aoga nei e fesoasoani i nai fanau e vaivai i le faitautusi.”

O le faigapaaga lenei a le Kolisi ma le aiga a Muir o le a faaauauina pea ma sa tuuina ai le avanoa i nisi o vaega e talosaga ai le Kolisi e manaomia.

“O vaega sa talosaga ai mo sporting gears e faaaogā e le fanau aoga i taaloga ia sa tuuina ai foi le fesoasoani i le tulaga o le freight o loo iai nisi o uo ma paaga i Niu Sila e mafai ona o latou faatupeina lea tulaga.

“E lē o le tele o mea e foaiina e tusa pe itiiti ae ia aogā mo alo ma fanau aoga.”