E 15 miliona ua lipotia ua tuuina e le malo o Niu Sila mo Samoa o se faiga paaga fou a malo e lua i le tulaga o suiga o le tau, climate change ma ua tuuina foi le 12 miliona mo le toe fausia o le maketi i Savalalo e pei ona lipotia e le One News.
O le feiloa’iga a ta’ita’i o atunuu e lua e pei ona faataunuuina ai i Samoa i le vaiaso nei ua agiga ai ma lea fesoasoani. O le Samoa Aotearoa NZ Climate Partnership e pei ona saunoa ai le tamaitai palemia o Jacinda Ardern o lea vaegatupe o le a fesoasoani i le tali atu a le atunuu i aafiaga o suiga o le tau.
Ua ia ta’ua foi i lea lava lipoti o le toe fausia o le maketi e faamautu ai le taula’i o le vaai a Niu Sila i le toe faaleleia o le tamaoaiga e ala i le lagolago i pisinisi laiti, aemaise o taumafaiga a le itupa o tina ma tamaitai ma pisinisi i totonu lava o le lotoifale. Sa feiloa’i foi le palemia ma le Kapeneta a Samoa ma faatalanoa isi mataupu tau i le itulagi ma le va o atunuu e lua, mataupu e aofia ai le tamaoaiga, suiga o le tau ma le Koviti-19.
O le faamanatuina foi o le 60 tausaga o le maliega faaleuo a atunuu e lua, le Treaty of Friendship na malaga ai le Palemia o Ardern ma lana aumalaga i lo tatou atunuu.
