I se lipoti lata mai, a itiiti mai e to’a 15 tagata ua maliliu i le mae’a o le afā o Milton na aafia ai le setete o Florida i Amerika.
O le aofa’iga lea e aofia ai ma le to’a 6 na maliliu mai St Lucie County lea na aafia i le asioasio a o aga’i atu le afā malosi.
O lipoti mai le pitonuu lea ua faamatala ai e tagata o latou sa tapena mo le afā ae faate’ia i le tasoo atu o lapata’iga o asiosio o le a aafia ai lo latou faaitu ma e ese se vaaiga na iai i le aso ananafi ma tele mea ua faaleagaina.
Na vaaia loimata o le faanoanoa ma le mafatia i nisi i lea itu o le lalolagi sa faatalanoa mai i luga o televise a le NBC, e lē gata i le ma’umau o soifua ae o le anoano o mea ua faaleagaina ona o le malosi tele o Milton.
Ua ta’ua e silia ma le 3.4 miliona tagata ua motusia mai le eletise mai o latou fale ae faailoa foi e le peresetene, Joe Biden e silia ma le afe le aufaigaluega a le Coast Guard ua aga’i atu mo le ofoina atu o le fesoasoani i faaitu ua aafia i le afā.
O loo faatino i le asō galuega faamamā ma sa’iliga pe iai nisi soifua o aafia ae lē o iloaina.
O loo fautuaina pea tagata e faaeteete e ui ua aga’i ese le afā mai le setete ae ao ona faaeteete i lōlōga ona o loo fai lava si mamafa o timuga.
Puna o Faamatalaga: https://www.nbcnews.com/weather/hurricanes/hurricane-milton-damage-florida-tornadoes-flooding-power-outages-rcna174843
