Na fiu e tatali ie faamalama, fiu e vili, toe sue atu le tuatusi o loo faasalalau ai i luga o le upega tafailagi e leai se vaega faapea i Aukilani.
I suesuega a le Fair Go a le TV1 ua toe molimau ai le toatele o tagata ua gau ma ua matuai le fiafia i le kamupani ua ta’ua o le Kiwi Window Furnishings poo le KWF.
O le kamupani lenei o loo faasalalau e iai lona ofisa i North Shore atoa ai ma le nofoaga o loo su’i ai ie faamalama, peitai e o atu e ese le kamupani ie faamalama e ana le tuatusi.
Ua ta’ua ai foi i lipoti le fiu e vilivili e le talia le telefoni a le alii pule ia Vijay Bhosale, ma o ia foi lea na tele ina feiloai ma paaga i o latou fale ma fua mai ie faamalama.
A o lē fiafia ai le toatele ma fiu e tulituli le alii pule, ae o le mea sa’o ua gau le Kiwi Window Furnishings poo le receivership, ma o loo faamuamua aitalafu totogi.
A o fai mai ai le alii pule i tala a le 1News o loo agai e toe totogi tupe a paaga ua le mafai ona faamalieina a latou oka, ae i suesuega a le Fair Go, e leai ma se isi ua toe faafoi tupe ma o nisi e oo atu i le $6,000 ua gau ai.
