Le afioga i le tamaitai faipule o Faasaleleaga Numera Tasi o le Minisita o Faamasinoga, le tofa Matamua Vasati Pulufana i le ootiina o le lipine e tatala aloa’ia ai faitoto’a o le maota poo le ofisa fou o le Faalapotopotoga o le faaputuga tupe o le lumanai manuia o tagata i Salelologa i Savaii.
E silia i le fitu miliona tala le tau o le ofisa fou o le NPF na umusa i le Aso Tofi o lenei vaiaso ma o se galuega na amata fuafuaina i le tausaga e 2018.
Faaalia e le tamaitai Palemia le afioga Fiame Naomi Mataafa na saunoa e tatala le galuega, o le tausaga e 2020 na amata ai ona fausia e le konekarate faufale o le Shwartz Construction le ofisa faatasi ai ma nisi o kamupani sa ave iai isi vaega o le galuega latou te faatino. O se maota o fausaga faaonaponei e lua ona fogafale.
Se vaega o le saunoaga autu a le tamaitai Palemia afioga Fiame Naomi Mataafa, i le umusaina o le ofisa fou o le NPF i Salelologa i Savaii. O le galuega lea sa amata fuafua i le taimi o le faigamalo sa iai, a o lumanai le palota tele ia Aperila o le tausaga na te’a nei, lea na filifilia ai le faigamalo fou a le vaega faaupufai o le Faatuatua i le Atua Samoa ua Tasi latou te tauave le pulega o le Malo.
