O le faaitiitia o le numera o tagata i Samoa ua maua i auga o le faamai Koviti-19 i le toetoe atoa le lima masina talu ona toe tatala tuaoi faavaomalo o le tatou atunuu ma aveesea uma aiaiga o puipuiga o Samoa mai le faamai, o faamaumauga lata mai a le Matagaluega o le soifua maloloina ua faailoa ai e fitu gasegase fou o le koviti na faamauina i le fitu aso ua mavae.
O lea aofaiga na faamauina mai nofoaga o loo siaki ai gasegase e aofia ai falemai faaitumalo ma falemai tutotonu.
O lona uiga i le faitau atu i ia faamaumauga ua tuuina faalauaitele mai e le soifua maloloina, o loo faaitiitia le aofaiga o tagata o loo aafia i le faamai.
O faamaumauga foi nei ua maua ai le tuuaofaiga o tagata i Samoa na maua i le Koviti-19 i le 15,982.
O tagata na maliliu i le faamai o loo faamauina pea i le toa 29, o lona uiga e lei toe iai lava se soifua na fano ona o auga o le faamai.
