O le tamaitai loia o loo galue tutoatasi le susuga Leinafo Tuimalealiifano, ua ave iai e le ofisa o le Loia Sili a le Malo le galuega o le finauina o moliaga e silia i le 20 faasaga i le tamaitai Samoa e faamautu i Amerika, o Perking poo Pekina Tauvao.
Na faailoa lea fuafuaga ina ua toe valaau le mataupu ma tulai lē ua molia i le faamasinoga faaitumalo i le Aso Lua o le vaiaso nei.
Talu ai le manaomia e le loia tutoatasi ua avea nei ma loia a leoleo e finauina moliaga, se taimi e silasila ai i moliaga o lē ua molia, ua toe tolo atu ai i le Aso Faraile nei e toe fofogaina ai, ma o le a iloa ai ma se tali a Pekina i moliaga uma ua faamautu a leoleo.
O le mataupu i le tamaitai o Lyn poo Marylynn Nauer o Laulii, o loo molia i lona maua o ni seleni i se faiga taufaavalea, e lei mautu uma moliaga a leoleo ma ua faaauau ona nofo taofia ai.
Peitai o le aoauli ananafi na toe tulai ai o ia i le faamasinoga faaitumalo mo lana talosaga e fia tatala i tua i ni aiaiga e faatali ai taualumaga o lona faamasinoga. E auina atu lenei lipoti e lei maua mai se faaiuga o lana talosaga.
