A o feagai ai i le taimi nei le taitaifono ma sui o le Komisi suesue o faigapalota, ma le galuega o le tuu faatasia o le latou lipoti e tuuina atu i le Palemene, ua faailoa lautele e le Faamalu o Faalapotopotoga tuma’oti i Samoa e silia i le 200 ona sui auai, le latou folasaga ua mae’a ona tuuina atu i le komisi suesue, ua folasia ai lagona o sui o le faalapotopotoga ua ta’u faapuupuu o le SUNGO poo le Samoa Umbrella for Non-Governmental Organization
O nisi o ia folasaga ua finau ai le faalapotopotoga, ua tatau ona tatala le avanoa e faatino mai ai i fafo le palota a tagatanuu o Samoa e agavaa, ma ia tatala ma le avanoa e tauva ai i latou ua umia suafa matai i tofi o itumalo i le Palemene.
O lea folasaga ua ave ai le tuualalo i le komisi suesue e silasila i ni auala talafeagai e avanoa ai ona faatino lea tulaga. O loo mafai ona palota tagatanuu o Samoa o loo aumau i atunuu i fafo, ae e manaomia le malaga mai i Samoa e faatino ai lana palota.
O le aiaiga o le 10 pasene e saili ai nofoa e ono o tamaitai mo tofi faipule o le Palemene, ua faailoa i le folasaga a lea faalapotopotoga tele i Samoa, e tatau ona aveesea ae toe foi i le tulaga sa sau a’i o le tauva tutusa o alii ma tamaitai ua umia suafa matai mo tofi faipule o le Palemene, ae uanaia malosi le ituvai o tamaitai e auai i faiga filifiliga e saili ai tofi o itumalo i upufai o le Malo.
O le vaevaega ua iai nei itumalo faapalota, o le isi lea o vaega o le folasaga a le SUNGO ua tatalo ai i le komisi suesue ina ia toe foi i itumalo faaleaganuu, ae aveese itumalo faapalota.
O mataupu e sefulu o loo autu iai le galuega a le komisi suesue o loo tali uma iai le faamalu o faalapotopotoga tuma’oti, ina ua mae’a se latou fonotaga sa auai sui uma e faaalia ai o latou finagalo.
O le masina fou o Novema o loo faamoemoe e tuuina atu ai le lipoti a le komisi suesue o faigapalota i le Palemene.
