O loo iai pea le avanoa o le tatou aulakapi taitoafitu a le Manu Samoa e maua ai sona tulaga lelei e sao ai i taaloga a le Olimipeka i Farani, i le tuanai o le vae o le taamilosaga i Farani i le faaiuga o le vaiaso na tea nei, ma le sauni atu i le vae mulimuli o le taamilosaga i Lonetona Peretania i le faaiuga o le vaiaso nei.
Ua faailoa i upega tafailagi le iai o nisi o le tatou ‘au ua faamanu’alia i le mae’a o taaloga talu ai nei ma ua fili atu ai nisi e sui ia i latou ua afaina i manu’aga.
O loo tulaga ono le tatou ‘au i le taimi nei e 116 togi poo points, a o Ausetalia o loo 125.
O ‘au e fā pito i luga ua mautinoa ua maua avanoa i le Olimipeka o Niu Sila, Argentina, Farani, ma Fiti.
O loo iai le isi avanoa mo le tatou ‘au e tausinio ai i le Olimipeka i Farani i le tausaga fou, pe a manuia i le taamilosaga lakapi fitu a atunuu o le Oceania ma o le avanoa mulimuli lea.
