Ua toe see atu se isi tamaitai o le atunuu e avea ma faauluuluga poo le Ofisa Sili o le pulega o feoa’iga i le laueleele le Samoa Land Transport Authority, le faletua Susuga Sagauga Leilani Miriama Galuvao.

O ia o se tasi o Ofisa Sili lagolago o loo galue ai i lea auaunaga a le Malo, ae sa tele foi nisi tausaga sa galue ai i nisi o matagaluega a le Malo.

O lona tuagane le tofa Tuiletufuga Leasi Galuvao sa uluai avea ma Ofisa Sili ina ua faatoa faatuina le pulega o feoaiga i le laueleele, sosoo ai ma le uluai tamaitai na avea ma Ofisa Sili o lea lava auaunaga a le Malo ua faamavae, le afioga Galumalemana Leoitiiti Tutuvanu Schwalger.

Ua sosoo ai nei se isi alo tamaitai o le atunuu le susuga Sagauga e tauaveina lea tofiga mo le umi e tolu tausaga.

Ua faailoa mai e le ofisa sooupu o le Malo le faamaonia ai e le Kapeneta o le filifilia o Sagauga Leilani Miriama Galuvao, ina ua mae’a ona faasalalau le avanoa ma faatalanoa i latou sa tusi talosaga.

O le LTA o se faalapotopotoga tuma’oti a le Malo e gafa ma le fausia o auala tetele, siakiina o taavale afi mo le saogalemu o le faaaogāina i feoaiga i le laueleele, faapea ona feagai ma le tapenaina o tagata e fia maua laisene avetaavale.