E fitu atunuu o le Pasefika ua aofia ai ma Samoa o le a aga’i iai se polokalame tau soifua mālōlōina e autū i le togafitia ma le tafiesea o le kanesa o le ala fanau poo le cervical cancer, lea e aafia tele ai le itupa o tinā ma tamaitai.
O le fono a Malo o le Taupulega ua mae’a, na faalauiloa ai e le ta’ita’i o le tatou Malo le tamaitai Palemia lea polokalame fesoasoani a le vaega e ta’ua o le Kirby Institute o le a lagolago ai i taumafaiga uma mo le tafiesea o lea ituaiga o kanesa.
E 25 tesimale 9 miliona tala le tau atoa o lea fesoasoani tau soifua mālōlōina o le a faasoa i atunuu e pei o Fiti, Kilipati, Atu Malesala, Solomona, Tonga, Vanuatu, ma Samoa.
Ua faailoa i se pepa o faamatalaga o le kanesa o le ala fanau e maualuga tele le numela o le itupa o tinā ma tamaitai i atunuu ua faailoa atu ua fano ai o latou ola ma soifua, ma o loo faailoa lea tulaga i faamaumauga a le faalapotopotoga o le soifua mālōlōina a le lalolagi.
O le faalauiloaina o lenei polokalame fesoasoani na faailoa ai e le tamaitai Palemia le afioga Fiame Dr Naomi Mataafa, o se avanoa lea o Samoa e faipaaga ai ma le Kirby Institute ina ia silasila i auala e sa’oloto ai mai le kanesa o le ala fanau.
Poo se isi faaupuga ia saili ai auala e mafai ona fesoasoani ai e togafiti ma tafiesea lea ituaiga o kanesa e aafia tele ai tamaitai.
Ua faamoemoe o le seleni o le a maua e Samoa mai lea polokalame o le a faaauau ai le polokalame o le su’eina o tinā ma tamaitai poo aafia i lea ituaiga o kanesa.
O le tausaga fou o loo fuafua e faatino ai lea su’esu’ega faaauau poo le screening plan.
