Ua faitau masina o tālia se filifiliga o nisi o matagaluega tāua a le Malo le Soifua Maloloina ma le Matagaluega o Aoga Taaloga ma Aganuu, ae o le fono a le Kapeneta i lenei vaiaso ua faamaonia ai, le filifilia o le alii fomai le susuga Aiono Dr Alec Ekeroma e avea ma Faatonu Sili Aoao o le Matagaluega o le Soifua Maloloina, o se filifiliga ua faia a o tauave e lea tamalii le tulaga Pule Sili o le Iunivesite Aoao a Samoa.
O lona uiga o le a toe sailia se isi Pule o le iunivesite a le atunuu. Ua see atu Aiono Dr Alec Ekeroma e faaauau le pulea o lea matagaluega tele a le Malo sa avea ai se isi alii fomai le tofa Leausa Toleafoa Dr Take Naseri ma Faatonu Sili aoao mo le fitu tausaga talu mai le tausaga e 2014.
O le matagaluega o Aoga Taaloga ma Aganuu o lona Ofisa Sili fou ua filifilia iai le afioga A’eau Chris Hazelman, o se tamalii o loo ia umia tomai ma faailoga i aoaoga ma sa avea ma Faatonu o Aoga a le Ekalesia Katoliko mo ni tausaga, a o lei avea ma Faaao o le iunivesite Aoao o Samoa o se tofiga na filifilia iai i le tausaga e 2017.
Ua suitulaga o ia i le faletua le afioga Afamasaga Dr Karoline Fuata’i sa tauaveina lea tofiga mai le tausaga e 2016 na uluai filifilia ai.
O le tausaga e 2019 i le 2022 lana konekarate 3 tausaga mulimuli i le tofiga Ofisa Sili o le matagaluega. O loo tālia le filifilia o nisi o faauluuluga o auaunaga a le malo e pei o le Loia Sili, le Ofisa Sili o le Matagaluega o Tiute ma Tupe Maua, ma le Komesina o le ofisa o le komisi o faigapalota.
