Ua see atu nei se tasi o tamaitai o le atunuu sa faauluulu iai aoaoga i tomai faatusitala ma faasalalau i le Iunivesite Aoao a Samoa le afioga Misa Victoria Lepou, e faauluulu iai galuega a le televise le TV9 ma le leitio o le 2AP a le Malo o loo i Mulinuu.
O ia o se tasi ua filifilia i le tofiga Ofisa Sili Lagolago o le Matagaluega o Fesootaiga ma Faamatalaga Tekonolosi o loo iai le pulea o ia auala o faasalalauga o loo faatupe e le Malo.
O le vaiaso nei na amata galue ai i lea tofiga, sa tauave e se tamalii mo ni tausaga le susuga Letoa Tevaga Matini Faasino.
Ua faaalia e Misa lona agaga faafetai i le filifilia o ia e tautua ma galue i lea auaunaga a le Malo mo le atunuu, ma ua lava taoso i ona faailoga ma tomai aoaoina i galuega faatusitala ma faasalalau e siitia ai i se isi tulaga sili atu ia auaunaga tau faasalalau a le Malo auā le atunuu lautele.
Ua faailoa e Misa ua mae’a ona faamautu le faaaogaina o polokalame a le Televise a le Malo o Ausetalia le ABC mo faasalalauga i le alaata tau televise a le Malo.
Sa maua se avanoa e faatalanoa ai le tamaitai Pule Sili Lagolago e tusa ai ma lona valaauina na te vaaia le TV9 ma le Leitio o le 2AP.
Se faatalanoaga ma le tamaitai Pule Sili Lagolago o le Matagaluega o Fesootaiga ma Faamatalaga faatekonolosi ua vaaia auaunaga o le televise ma le leitio a le Malo.
