O le masina o Fepuari e pei ona faailoa e se molimau, na filifilia ai e le Malo le afioga Tuaopepe Dr Cam Wendt o se tamafanau a le atunuu e avea ma Konesula o le tatou malo i le ofisa o loo i le aai o Sini i Ausetalia.

Ua faamaonia lea filifiliga i se pepa a le Kapeneta ua saini ai le failautusi le tofa Agafili Tomaimano Shem Leo, o le Ofisa Sili foi o le pulega o le Matagaluega a le Palemia ma le Kapeneta.

E filifilia Tuaopepe Dr Cam Wendt o loo avea ma se tasi o ofisa sili lagolago mo le matagaluega fou ua ofaga uma nei iai Faalapotopotoga Tuma’oti a le Malo le Ministry of Public Enterprises.

O ia o se alo e faasino i se tasi o tamalii sa avea ma Faipule o le Palemene mo le nofoa o le itumalo o Lefaga ma Faleaseela i paeaiga ua tuanai, le Afioga Tuaopepe Felix Wendt lea sa avea foi ma Amepasa muamua o le Malo o Samoa i totonu o le Malo tele o Amerika.

Ua faailoa i le pepa o le filifiliga a le Kapeneta, le totogi ma isi faamanuiaga o le a maua e le Konesula filifilia a o ia tauave ai lea tofiga maualuga o le Malo o Samoa mo le 3 tausaga.

Ua faailoa foi i le pepa o le filifiliga e 3 isi tausaga e toe faaopoopo pe a mae’a le 3 tausaga muamua (3 + 3).

Ua suitulaga o ia i se isi tamalii o le atunuu sa avea ma Konesula i Sini Ausetalia le afioga Auseugaefa Vaasatia Poloma Komiti.

O le Konesula fou le Afioga Tuaopepe Dr Cam Wendt o se tasi e auai ma faamaopoopo i le atinaeina o le taaloga alo vaa i totonu o Samoa.