Ua filifilia nei e le Faalapotopotoga Faavaomalo mo le Puipuia ma le Faasaoina o le Si’osi’omaga, le Conservation International, le afioga Fiame Naomi Matā’afa e avea ma sui o le Komiti a lea faalapotopotoga ua ta’ua o le Arnold Distinguished Fellowship Programme.

Ua lipotia i se pepa faalauiloa mai le Conservation International, o le filifilia o le afioga i le Sa’o Faapito sa avea ma Palemia o Samoa ua to’avalu iai ia te ia sui o lea Komiti, ua faaigoa i se tasi o sui o le faalapotopotoga o Henry Arnold sa taulāmua i galuega faatino a le faalapotopotoga i le lalolagi mo le puipuia o le si’osi’omaga ma faalauiloa polokalame i suiga tetele o le tau.

Advertisement

O se tasi o tiute tau’ave a le afioga Fiame Naomi Matā’afa i le avea ai ma sui o lea komiti o le una’ia o faalauiloa mo le puipuiga o atunuu o le Pasefika mai suiga o le tau faapea le saogalemū o le vasa lanu moana o le Pasefika.

Faaalia e le Ofisa Sili o le Conservation International, o le telē o le silafia o le afioga Fiame Naomi i le tele o tausaga o avea ma ta’ita’i ma lotolotoi i galuegafai mo le atiina a’e o atunuu i lenei faaitulagi o le a tāua lea i sona sao i galuegafai a le komiti.